Inmigración e prostitución nos contidos mediáticos. Unha análise diacrónica ao redor da construción da Outra na prensa galega e estatal

Resumo

As mulleres constrúense nos medios de comunicación como as Outras, fronte ao protagonismo do home branco, en cargos de poder e clase media alta como protagonista maioritario. Mais a esta discriminación de xénero únese, no caso das mulleres que exercen a prostitución, discriminacións de clase, e/ou relacionadas coa procedencia nacional, étnica ou racial, dado que prostitución e inmigración están, no Estado español e en Galicia, relacionadas de modo estreito. Os estudos sobre Comunicación e Xénero no Estado deixaron en segundo lugar a análise da intersección da discriminación de xénero con outro tipo de discriminacións. Neste traballo analizaremos a contribución da prensa á construción das mulleres que exercen a prostitución como as Outras das Outras. Os resultados foron obtidos en dúas investigacións, unha a nivel galego, e outra, froito da traslación do estudo galego ao contexto do Estado, baseadas na combinación da análise de contido e da análise crítica do discurso.