Organización e estrutura do antígrafo dos Cancioneiros da Biblioteca Nacional e da Biblioteca Vaticana

Resumo

A presente achega céntrase no antígrafo de B e V, é dicir, a Recompilación xeral da lírica trobadoresca, co obxectivo de analizar a organización dos seus contidos e a súa estrutura material. En canto á organización, parte das investigacións de C. Michaëlis de Vasconcellos, G. Tavani e A. Resende de Oliveira, complementadas cos resultados atinxidos polo autor nos seus anteriores traballos sobre variación scriptolingüística e estratigrafía textual. Por outra banda, preséntase unha proposta de reconstrución da configuración material do códice, perdido desde o século XVI. Para tanto, procédese a unha análise codicolóxica dos testemuños derivados dela, a saber, os propios apógrafos B e V. Avánzase mediante o estudo combinado de ambos os códices e da información sobre a fasciculación e foliación do antígrafo que estes presentan. As conclusións resumen os resultados acadados en canto á ordenación das composicións no soporte orixinal, os procedementos de incorporación de novos materiais e as operacións subxacentes de integración, copia, revisión, emenda, adición e reordenación. Os resultados conseguidos supoñen un avance substancial no coñecemento do proceso de constitución da tradición manuscrita da lírica trobadoresca galego-portuguesa.