Cartafol de poesía, de Celso Emilio Ferreiro. A verdadeira historia dunha obra minúscula

Resumo

Neste artigo abórdanse os problemas que presenta Cartafol de poesía, iniciativa literaria de Xosé Velo e Celso Emilio Ferreiro da que se posúe unha percepción pouco clara aínda hoxe en día. Tales problemas afectan fundamentalmente á súa configuración, de contornos imprecisos, e á data de publicación, 1935 ou 1936. Inicialmente estúdase a recepción de Cartafol de poesía antes da Guerra Civil e no período posterior ao conflito bélico. A seguir examínanse, por unha parte, os testemuños de Celso Emilio Ferreiro relativos a este título e, por outra, a presenza do mesmo nas edicións sucesivas da súa obra. Realizados estes labores, arróxase luz sobre a historia de Cartafol de poesía no contexto da produción poética do autor de Celanova antes de 1936. As dúas conclusións que se alcanzan, a partir da comparación de tres exemplares orixinais, é que Cartafol de poesía se trata dunha obra minúscula constituída por unhas tapas de cartolina para gardar paulatinamente unha colección de poemas, da cal só se distribuirían dous, que ten como data a primeira metade do ano 1936.