Fernando Osorio do Campo: historia dunha investigación

Resumo

A figura dun dos homes máis relevantes do movemento teatral das Irmandades da Fala, Fernando Osorio do Campo, viña sendo un misterio para a historiografía teatral galega. As noticias relativas á creación do Conservatorio Nacional de Arte Galega informaban da súa orixe coruñesa e da formación dramática recibida en Lisboa, mais era moi pouco o que coñecíamos dese período anterior ao ano 1919. Por súa vez, as tebras ocultaban de novo o percurso vital de Osorio desde 1924 –ano en que publica a obra teatral Desourentación– e non coñecíamos cousa ningunha do seu paso polo mundo fóra dunha lembranza publicada en 1971 por Marino Dónega sob o título “Un home, unha aventura, un tempo”, un artigo en que o que sería secretario da RAG recollía momentos sorprendentes dunha intensa vida desenvolvida en tres continentes e informaba de textos dramáticos da súa autoría que aínda permanecen inéditos. No presente traballo dáse conta do proceso de pesquisa realizado desde 2008 por media ducia de países á volta da vida e da obra teatral de Fernando Osorio, ben como do propio sentido de moldar hoxe unha biografía e das técnicas de investigación postas en práctica para atinxir o albo de construír un relato documentado da vida de Osorio e editar e difundir os textos teatrais felizmente localizados.