Correspondencia Maruja Mallo-Alfonso Reyes (1938-1945). Edición anotada

Resumo

Partindo de que o epistolario entre Maruja Mallo e Alfonso Reyes transcende o privado, a súa edición anotada trata de contribuír ao deseño do mapa do sistema literario hispanoamericano, tendo en conta o aspecto económico-social e as circunstancias históricas; tamén axuda a afianzar o valor da correspondencia como fonte de información. Ademais, procura visibilizar o papel que nel desempeñaron, sobre todo no eido das publicacións, os refuxiados da guerra civil española, así como os nexos que estableceron co campo cultural de México e Arxentina entre 1938 e 1945. As anotacións non atenden á biografía nin ao conxunto das realizacións das persoas que aparecen mencionadas nas cartas, e si a coñecer o contexto e algunhas das relacións socio-persoais e profesionais do ensaísta, da pintora e dos seus amigos exiliados nos países citados.