As mulleres como fazedoras e gardiás da cultura escrita na Galicia medieval. Unha achega preliminar

Resumo

As mulleres estabeleceron un amplo conxunto de relacións coa cultura escrita no seo da sociedade medieval galega. Non obstante, máis alá de insistir unha vez máis nas dificultades que se presentan á hora de documentar a súa alfabetización e o seu papel como escritoras ou autoras, e incluso como lectoras –os temas que estiveron máis presentes nos estudios socio-literarios sobre as mulleres medievais–, o obxectivo deste traballo é ofrecer, a partir das fontes galegas, unha achega preliminar a esa máis complexa e, sobre todo, máis heteroxénea rede de relacións que existiron entre as mulleres e a cultura escrita, presentándoas, fundamentalmente, como fazedoras e gardiás da cultura escrita medieval na súa condición de promotoras, impulsoras, mecenas, propietarias, transmisoras ou custodias de textos documentais, literarios ou epigráficos. Trátase, polo tanto, de ofrecer unha proposta global para repensar a relación das mulleres medievais galegas coa cultura escrita en clave de iniciativa, promoción ou “axencia” (agency) femininas e de insistir na participación activa das mulleres na produción e conservación do patrimonio documental da Galicia medieval.